John Grisham - The Racketeer (Vurguncu)

     Dünyaca məşhur bir çox yazarlar var ki, ən çox oxunanlar siyahısında ilk pillələri tuturlar. Amma çox təəssüf ki, azərbaycan oxucusunun seçicilik qabiliyyəti bu barədə bir qədər kasad olduğundan hələ ki bu yazarları ya ümumən tanımırlar, ya da sadəcə adlarını eşidirlər. Ona görə düşündüm ki, azərbaycanda geniş kütlənin hələ də tanımadığı, amma romançılıq dünyasının əjdahalarından olan yazarların kitablarıyla həm özüm tanış olum, həm də az da olsa oxucu kütləmi tanış edim.

Beləcə başladıq ilk 3 yerin daimi sakini olan usta yazarlardan biri olan John Grishamdan.  Grisham dedektiv janrında yazan, amma digərlərindən fərqli olaraq romanları ədliyyə xarakterli olan bir dedektiv yazardı. 1955 ci il doğumlu olan yazar ilk romanı olan "The time to kill" 1984cü ildə çapdan çıxdı. Dünya üzrə Grishamın 250 milyondan çox nüsxə  kitabı satıldı. Tək basqıda 2 milyon kitab satan üç yazardan( Digərləri  Tom Clancy ve J.K. Rowlingdir) biridir. 

The Racketeer kitabı Grishamdan oxuduğum ilk roman idi və müthiş bir ssenariyə malikdi. Dedektiv janrı azərbaycan üçün Doyl, Agatha Christie, Elxan Elatlı, Çingiz Abdullayev və bəlli bir kütlə üçün John Verdondan ibarətdi, amma Grisham bu siyahıdakılardan daha irəli getməyi bacaran biri təsəvvürünü yaratdı məndə. Eləcə də yuxarıdakı siyahıdakılardan daha tutarlı yazmaq qabiliyyəti olan bir neçə yazar daha var ki, vaxtı gələndə haqlarında yazacağım bloglardan məlumat ala biləcəksiniz.

Racketeer romanı haqqında danışaq. Amerikada verdikləri sərt qərarlarla tanınan bir çox federal hakimlər var, amma tarix boyu onlardan cəmi 4ünün öldürülməsi ilə rastlaşıldı. Hakim Fawcett bunlardan beşinci oldu. İstirahət evində başına iki güllə ilə öldürülmüş vəziyyətdə evin  girişində tapıldı. Katibəsi isə qonaq otağında divanda əlləri bağlanmış və işgəncə gördükdən sonra öldürülmüşdü. Kitab rəfinin arxasında bir hakimin istifadə etməsi üçün çox şübhə doğuran açılması çox çətin şifrəli və hakimin maaşının ötəsində olan bir kassa açıq vəziyyətdə tapılıb. FBI hadisənin necə baş verdiyini, kimin etdiyini və ən önəmlisi bu cür bahalı bir kassanın içində adi federal hakimin nə gizlətdiyi sirrini açmaqda acizdi.

Bütün bu sualların cavabını bilən yalnız bir nəfər var.. Yanlış insanları müdafiə etdiyi üçün layiq olmadığı halda həbsxanaya düşüb 10 illik həbs cəzası alan qaradərili vəkil Malcolm Bannister. Tam 2 ildi ki, bu cəhənnəmdən qurtulmaq üçün əlində olan bu bilgidən necə yararlanacağının planını quraraq yaşayır və burdan çıxmaq üçün bu onun son şansıdı..

Kitab boyu vəkil Bannisterin başından keçənlər son səhifələrə doğru “Ay Səni” dedirtəcək mükəmməl və bir azcıq şansı gətirməsinə baxmayaraq, heç bir problemsiz gedən planıyla Bannister istədiyi nəticəni alır. Bu kitab sizi qopa bilməyəcəyiniz və indiyə qədər oxumadığınız tərzdə olan bir dedektiv janrda olan hadisələrin içinə atır.Florida, Vaşinqton, Yamayka, Aguanta üzrə gedən seyahət boyu Bannisterin ağlına heyran olmaya bilməyəcəksiniz. Grisham ilk sıralarda əbəs yerə oturmadığını sanki səhifələr arasından sarkazmlı gülüşlə bizə çatdırır.

Xoş Qiraətlər.