Bəzi musiqilər var ki, mənə özümü onunla birgə addımlayıram kimi hiss etdirir. Sanki müthiş bir not yarışı var və yəhərdə oturan özüməm. Sözlər şirin bir çay kimi axıb gedir beynimin içindən. Bütün idarə mənim əlimdə olur, özümü güclü hiss edirəm. Amma bəziləri elə deyil. Bəziləri insana özünü güclü bir axının önündə duran qaya parçası kimi hiss etdirir. Bütün pis xatirələrini, ya da xatırlamaqdan qaçdığın hadisələri bütün çılpaqlığı ilə üzünə vurur. vurduqca vurur və vurduqca səndən bir parça qoparıb aparır o axın. Bəzənsə elə mahnılar olur ki, sahildə tənbəl duruşuyla dikilən söyüd kimi hiss etdirir insana özünü. Şırıltısı insanı nə şirin, nə acı; mümkün olan bütün xatirələrini özündə cəmləşdirən səs kimi qulaqlarına, qəlbinə doluşur. Dadını göz yaşlarında hiss edə bilirsən. Sərin bir mehin bədəninə saldığı o üşütməni qəlbində duyursan. Kövrəlməkdən, ötən zamanı və gələn zamanın bilinməzliyində əriyib yox olursan. İnsana mənliyinə qucaq açdıran mahnılar var. Bax o mahnılar insana özünü fəna yaşlı hiss etdirir. Yatmış olan çox şeyi dirçəldir, amma bir şeylərin də içində qırıldığını danmamaq lazımdı.. Bax bu onlardandır.
Qaldırın qədəhləri. Gələn günlərimizə və keçən xoş anlara..
Comments
Post a Comment