Bənövşə günü

Bizim məktəbdə Əlzahir adında bir kitabxanaçı var idi. Zəqqumsifətin biri idi. Amma məni çox istəyərdi. Tez-tez gəlirdim kitab ardıyca. Neçə yaşım var idi birinci dəfə kitabxananın qapısında çəkingən durub içəri girmək narahatçılığı keçirəndə? 10? Deyəsən elə idi.

Bu gün 22 yaşı geridə qoyub 23-ə ayaq açdım. 12 il ötüb ən azı o gündən. Hər il bir az daha qarmaşıqlıq dolu duyğular içində oluram. Evə gəlib oturub düşünürəm bayaqdan. Bu cür doğum günü keçirmişdim mi indiyə qədər? Məncə, yox. ☺

Səni bilmirəm, əziz oxucu, amma mənim ölmədən öncə etməyi istədiyim bir neçə şey var. Bu gün gözəl və əziz bir insanın sayəsində ikisini edə bildim. Əsl yeni yaşın başlanğıcında edilə biləcək şeylərdən idi. 

Uşaq olanda qonşu kənddə xalamgil yaşayırdı, ayda ən azı bir dəfə ora gedərdik qonaq. İplə çəkirdim o günləri, çünki əsrarəngiz bir şey var idi orda, At! 

Bu gün uzun illərin arzusunu gerçəkləşdirib nəhayət ki, bir ata yaxınlaşa bildim, sığallaya bildim, ən əsası yəhərin üstünə çıxma cəsarətini tapdım özümdə. Bütün o duyğuları ifadə edə bilmərəm, uşaqlığımın neçə-neçə xatirəsi, xoş anı yığılıb qalmışdı illərdi içimdə. Hamsı birdən gün işığına çıxdı Bakının bu günkü küləyinin müşayətində. Üzümdəki ifadəyə cavabdeh deyildim bu gün, amma bir kiçik uşaq vitrində həsrətlə izlədiyi oyuncağı əlinə alanda nə qədər sevinc keçirə bilərsə, o qədər də sevinc keçirdim. 

İkinci etmək istədiklərim arasında bir qədər də uşaqca olanıdı. Böyük bir auditoriyada oturmusan, əziz oxucu? Alqışlanası məqam gələndə bir-birinə toxunan əllərin səsi ətrafını bürüyəndə onlara dəstək çıxmısan? əlin qızarana kimi alqışlamısan nəyisə ya kimisə? Mən çox etmişəm. Amma uşaqlıqdan bəri o alqış zəncirini başladan adam olmaq istəmişəm. Gülmə! mənim üçün çox istək duyduğum bir məsələdi bu. Bu iki önəmli istəyimdə yanımda bənövşə kimi gözəl Aysel var idi. gün boyu paylaşdığımız saatları keçirəm, bir məqamı burda qeyd eləməsəm, yata bilmərəm bu gecəni. Teatrda olmaq istəyimi də zatən Aysel sayəsində gerçəkləşdirmişəm, alqış mövzusundakı istəyimi bir dəfə yanında demişdim, bu gün "Ölülər" tamaşasını birlikdə izlədik(hamınıza məsləhət bilirəm, möhtəşəm ötəsi bir şey idi), Aktyorun çıxışını sonlandırdığı an hələ ki içəridə sakitliyin çökməyindən istifadə edib cəld "tez ol, tez ol, alqışla" deyib içimdəki kompleksi darmadağın etdi bu gün. O alqışı nə az nə çox iki dəfə mən başlatdım! Necə xoşbəxtəm, anlamazsınız ! Bəli, bu gün bir yaşım artmayıb, əksinə uşaq olmuşam. ❤ Başlığı sənə Həsr edirəm, Xanım !

Bu doğum günümdə təbrik edənim əvvəlki illərdən az oldu. günə elə təbrik mesajları ilə başladım ki, hansına daha çox kövrəlim bilmədim. Hamınızı çox sevirəm, tələbələrim, dostlarım, əzizlərim, qucaqlayıb nəfəssiz qoya biləcəyim bütün o əzizlərim. Həyatımı daha mənalı edirsiniz. 

Bir hekayə barədə bu gün söz də verdim, dönüşü yoxdu artıq bu yolun. 👀  Şirin bir tortun və gözlənilməz bir ay işığı dolu gecənin təsvirinə qapılıb verilən bir sözdü və tutmaqda qərarlıyam. Zövq alaraq oxumağa başlayıb, sonunda məni söyəcəyin bir hekayə gələcək tezliklə, əziz oxucu.

Özümə nə arzulayıram? Arzuların ən gözəlini bir dostum xitab edib mənə və bu arzunu növbəti yaşa qədər arzulayıram özümə. 

Xoşbəxt olmaq üçün əlçatan şeylərə ehtiyac duymağı arzulayıram özümə. yeni yaşın gözəl olsun, Gənc İnsan !